Apartado para persoas afectadas con ideas suicidas
Probablemente non queiras falar con niguén, pero por calquera motivo, tes pensamentos sobre a morte ou mesmo de provocarte a morte. Antes de nada, le os consellos rápidos que deixamos a continuación. Neles atoparás información elaborada por profesionais para persoas que se atopan na túa situación.
Polo que:
1. Se estás en situación inminente de risco.
- Chama aos teléfonos de atención ao suicidio: 061 (Galicia) ou 024 (España).
- Acude a urxencias do hospital máis próximo.
- Se tes un problema de saúde mental, chama a túa persoa profesional de referencia.
2. Fala con alguén da túa confianza, amizade ou familiar, se a tes.
3. Acorda unha cita cun ou cunha profesional da saúde mental: psicoloxía ou psiquiatría
Se non sabes a onde ir, podes pedir axuda a familiares ou amizades para que che acompañen no proceso de xestionar unha cita ou che aconsellen a quen acudir.
4. Pide información
É importante entender o que che está pasando, os riscos, as consecuencias e como facerlles fronte.
5. Busca recursos e asociacións
As asociacións da túa contorna poden orientarche e darche apoio para coñecer os recursos aos que podes acceder. En Saúde Mental FEAFES Galicia contamos co programa “Conecta coa vida” de atención e prevención do suicidio.
6. Se che resulta de utilidade, crea un plan de seguridade coa axuda dun ou dunha profesional
Elabora o plan de seguridade sempre coa axuda dun ou dunha profesional. Isto serve para reducir o risco doutro intento e podes compartilo con familiares ou amizades de confianza.
Conecta coa vida 
